ភ័យនឹងគេដេញវ៉ៃខ្លាំងពេកជិះម៉ូតូទៅបុកជាមួយនិងរថយន្តស៊េរីទំនើបពេញទំហឹងបណ្ដាលឲ្យរងការខូចខាតយ៉ាងដំណំ...

ភ្នំពេញ៖បុរសម្នាក់ជិះម៉ូតូក្នុងល្បឿនលឿនដោយសារតែមានគេតាមដេញវ៉ៃពីក្រោយទើបភ័យស្លន់ស្លោមិនបានប្រយ័ត្នជ្រុលទៅបុកជាមួយនឹងរថយន្តស៊េរីទំនើបពេញទំហឹងបណ្ដាលឲ្យរងការខូចខាតយ៉ាងដំណំ ។

ហេតុការណ៍នេះបានកើតឡើងកាលពីវេលាម៉ោង០៨នឹង៣០យប់ ត្រូវនឹងថ្ងៃទី២៨ ខែកក្កដា ឆ្នាំ២០២១ តាមបណ្ដោយផ្លូវលោកឧកញ៉ាម៉ុងរិទ្ធី ស្ថិតក្នុងសង្កាត់ទូលសង្កែទី០២ ខណ្ឌឬស្សីកែវ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថានូវមុនពេលហេតុការណ៍គ្រោះថ្នាក់ចរាចរណ៍នេះបានកើតឡើងបុរសម្នាក់បើករថយន្តស៊េរីទំនើបម៉ាកEQUUS ពណ៍ខ្មៅមួយគ្រឿងពាក់ស្លាកលេខភ្នំពេញ2O-1000 បើកធ្វើដំណើរតាមបណ្ដោយផ្លូវ លោកឧកញ៉ាម៉ុងរិទ្ធី ខណៈពេលមកដល់ត្រង់ចំណុចកើតហេតុខាងលើក៏ស្រាប់តែមានបុរសម្នាក់ជិះម៉ូតូម៉ាកMSX ពណ៍ទឹកក្រូចលាយខ្មៅមួយគ្រឿងពាក់ស្លាកលេខភ្នំពេញ1CQ-9269 ដោយសារតែមានបក្ខពួកក្មេងស្ទាវមួយក្រុមបានដេញតាមវៃពីក្រោយទើបរូបគេជិះម៉ូតូក្នុងល្បឿនលឿនទាំងភ័យស្លន់ស្លោក៍ទើបបណ្ដាលឲ្យជ្រុលទៅបុកជាមួយនឹងរថយន្តស៊េរីនោះពេញទំហឹងតែម្ដងបណ្ដាលឱ្យរងការខូចខាតយ៉ាងដំណំ។

ក្រោយកើតហេតុសមត្ថកិច្ចមូលដ្ឋានក៏បានចុះទៅដល់ទីតាំងនោះភ្លាមដើម្បីធ្វើការវាស់វែងហើយនិងជួយធ្វើការសម្របសម្រួលមកដល់ភាគីទាំងពីសងជាសំណងរាល់ការខូចខាតដើម្បីបញ្ចប់រឿង។