ក្នុងវេទិកានេះមានការចូលរួមពី ឯកឧត្តម លោក លោកស្រី ក្រុមការងារថ្នាក់ជាតិ ថ្នាក់ខេត្ត អាជ្ញាធរដែនដីបងប្អូនប្រជាពលរដ្ឋ មកពី ៣ ឃុំ ក្នុងស្រុក រួមមាន: ក្រុមការងារថ្នាក់ជាតិ ២១ នាក់ ក្រុមការងារថ្នាក់ខេត្ត ៤២ នាក់ ក្រុមការងារថ្នាក់ស្រុក ៣៤ នាក់ លោកមេឃុំ សមាជិកក្រុមប្រឹក្សាឃុំ និងមេភូមិ ប្រជាពលរដ្ឋ អញ្ជើញចូលរួមមកពី ឃុំចំនួន ០៣ឃុំ គឺ ឃុំពោធិ៍ឃុំច្រណូក និងឃុំត្រងិល សរុបរួម ៣៩២ នាក់ ស្រី ៥០ នាក់។
សំណួរ និងសំណូមពរដែលទទួលបានសរុបមានចំនួន ២២ ចំណុច ពាក់ព័ន្ធនឹងប្រព័ន្ធធារាសាស្ត្រ ប្រឡាយទឹក ហេដ្ឋារចនាសម្ព័ន្ធផ្លូវថ្នល់ បញ្ហាព្រំប្រទល់ឃុំ សំណើសុំភ្ជួរដីស្រែឡើងទឹក និងបញ្ហាផ្សេងៗមួយចំនួនទៀត។ ឯកឧត្ដមប្រធានក្រុមការងារ និងឯកឧត្ដម អនុប្រធានក្រុមការងារ និងសមាជិកក្រុមការងារ ព្រមទាំងមន្ទីរជំនាញ បានខិតខំពន្យល់ បកស្រាយ និងពិភាក្សារិះរកវិធីសាស្ត្រដោះស្រាយជូនប្រជាពលរដ្ឋបានស្ងប់ចិត្ត និងទទួលយកដោយក្ដីសប្បាយរីករាយ ចំនួន ១៨ នៅសល់ ៤ បញ្ហា ក្រុមការងារបានទទួលយកមកពិនិត្យដោះស្រាយបន្ត ហើយនិងផ្ដល់ព័ត៌មានត្រឡប់ជូនប្រជាពលរដ្ឋជាបន្តទៀត។
មានប្រសាសន៍ផ្តាំផ្ញើនាឱកាសនោះដែរឯកឧត្តមប្រធាន បានលើកឡើងថា ដើម្បីគាំទ្រ និងរួមចំណែកជំរុញការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយ និងកម្មវិធីកំណែទម្រង់នានា របស់រាជរដ្ឋាភិបាលកម្ពុជា សម្រាប់នីតិកាលទី៦ នៃរដ្ឋសភា រាជរដ្ឋាភិបាលបានសម្រេចបន្តចាត់តាំងក្រុមការងារថ្នាក់ជាតិដើម្បីចុះបេសកកម្មតាមមូលដ្ឋានរាជធានី-ខេត្ត ក្រុង ស្រុក ខណ្ឌ សំដៅបន្តអនុវត្តកម្មវិធីនយោបាយប្រកបដោយប្រសិទ្ធភាពនៅគ្រប់មូលដ្ឋាននៅទូទាំងប្រទេស។ ឯកឧត្តមប្រធាន បានបន្តទៀតថា ក្រុមការងារថ្នាក់ជាតិ មានតួនាទីលើកកម្ពស់ការដឹកនាំសម្របសម្រួល គាំទ្រដល់រដ្ឋបាលថ្នាក់ក្រោមជាតិ ក្នុងការលើកកម្ពស់ការផ្តល់សេវា ការអភិវឌ្ឍន៍មូលដ្ឋាន ការដោះស្រាយបញ្ហានានាដើម្បីប្រជាពលរដ្ឋនៅក្នុងមូលដ្ឋាន ៕
No comments:
Post a Comment